Uppglenningur

Hverju er glerið að halda frá þér?

2011-01-25T23:46:00.000-08:00

Hversu mikið af tilverunni kemur til þín af skjá? Er jafnspennandi að horfa á hluti eins og að gera þá? Hefur þú tíma til að gera alla þá hluti sem þig langar til að gera? Hefurðu þrek til þess?
(Dansað á ösku daganna)

Stóra stjórnlagaþingsmálið

2011-01-25T08:26:00.000-08:00

Ég held að eftirfarandi tilvitnun í frétt Ríkisútvarpsins lýsi betur en nokkuð annað hvaða hvatir lágu að baki kærunni:

Skapti Harðarson, einn kærenda var ánægður með niðurstöðuna, og telur að ekki hefði verið hægt að komast að annarri niðurstöðu. „Heppilegast væri náttúrlega að flauta alla þessa vitleysu af og þetta fjáraustur á tímum þegar við höfum nóg annað við peningana að gera. En að öðrum kosti gætu þeir haldið áfram og efnt til annarra kosninga, sem ég held að væri nú bara til að bíta höfuðið af skömminni.“

Villandi verðmerkingar

2011-01-21T01:14:00.000-08:00

Við rákumst á DVD-disk með Stundinni okkar í verslunarleiðangri á dögunum. Nokkkur eintök af disknum voru í rekka sem var greinilega verðmerktur: 999 kr. (sem gera 1.000 krónur íslenskar). Það þótti mér gott verð og fleygði því eintaki í körfuna eftir að barnið hafði kinkað kolli til samþykkis. Þegar heim var komið renndi ég yfir kassastrimilinn og sá þá mér til undrunar að verslunin hafði innheimt 2.999 kr. (eða sem samsvarar 3.000 krónum íslenskum) fyrir diskinn góða. Ég gerði mér því aðra ferð í verslunina með krumpaðan strimilinn í vasanum. Þegar ég kom að rekkanum með DVD-diskunum sá ég að þar stóð enn stóru letri 999 kr. Það var ekki fyrr en maður rýndi í smáa letrið fyrir ofan að í ljós kom að verðið átti við disk með Strumpunum en ekki Stundinni okkar. Samt var verðmiðinn greinilega við rekka með Stundinni okkar.
Í kjölfarið hnippti ég í starfskonu og bað kurteislega um að fá að gera athugasemd við verðmerkingar í versluninni. Þegar ég hafði skýrt málið fyrir henni svaraði hún því til að maður gæti lítið gert við því sem viðskiptavinir tækju upp á og vildi því greinilega meina að einhver viðskiptavinur hefði sett diskinn í rangan rekka. Ég benti henni á að þarna væru að minnsta kosti þrír diskar í rekkanum. Þótti mér ótrúlegt að einhver viðskiptavinur hefði tekið sig til og enduraðað þeim öllum. ,,Maður hefur nú orðið vitni að ýmsu," svaraði afgreiðslukonan um leið og hún tók diskana og setti á réttan stað í hillunni. Loks tókst henni að kreista upp svolitla afsökunarbeiðni sem mér hefði þótt vænt um að heyra fyrr í samtalinu, helst fyrir varnarræðuna. Það sem fór mest í taugarnar á mér við þessa uppákomu var einmitt tregða starfskonunnar til að viðurkenna mistök verslunarinnar. Þess í stað var skuldinni umsvifalaust skellt á einhverja óprúttna viðskiptavini.

Komdu með fagottið

2011-01-18T08:52:00.000-08:00

Mikið afskaplega getur rétthugsun orðið leiðinleg og heimskuleg. Þó að orðið faggot sé vissulega niðrandi per se verður að skoða það í samhengi textans. Í þessu tilviki er ljóðmælandi flutningamaður sem öfundast út í rokkstjörnur á MTV. Honum finnst þær þurfa lítið að hafa fyrir sínu ljúfa lífi á meðan hann verður að strita við að flytja þunga muni á milli staða. Þykir honum hlutskipti sitt ósanngjarnt í samanburðinum og kallar því stjörnurnar öllum illum nöfnum, þar á meðal faggot. Nú vilja kanadískir útvarpssiðapostular banna flutning lagsins vegna þess að téð orð kemur fram í texta lagsins. Samkvæmt úrskurði nefndarinnar er eingöngu hægt að flytja lagið í breyttri útgáfu þar sem orðið hefur væntanlega verið strikað eða skipt út. Með sömu rökum mætti ,,hreinsa" orðalag allra fordómafullra og þröngsýnna persóna í bókmenntum heimsins. Gildir einu hvort um er að ræða skáldsögur, leikrit, ljóð eða dægurlagatexta. Að vísu hefur gætt aukinnar tilhneigingar til þess við endurútgáfu klassískra bókmenntaverka. Bendi ég á góða nýlega grein í New York Times í því sambandi. Þá vill oft gleymast að orðfæri sögupersóna endurspeglar ekki endilega skoðanir eða viðhorf höfundarins heldur er það hluti af persónusköpun hans. Fordómafullt eða heimskulegt orðaval afhjúpar því aðallega innræti skálduðu persónunnar en ekki höfundarins.

Feigð og fegurð í jólatrjáaskógi

2010-11-18T23:33:00.000-08:00

Við leitina að rétta jólatrénu sannast hið fornkveðna: Það geta ekki allir verið gordjöss. Það er samt ekki tekið út með sældinni að vera vel vaxinn og fallegur. Þeir sem hafa útlitið með sér gjalda fyrir það með lífinu. Aðeins þeir ljótustu lifa af.

Að hugsa í áratugum

2010-11-15T13:18:00.000-08:00

Skógræktarfólk þarf að vera framsýnt og þolinmótt enda sprettur skógur ekki á einni nóttu. Skógrækt er langtímafjárfesting þar sem ekki er neins skyndigróða að vænta. Skógræktarfólk gerir sér jafnvel ekki vonir um að sjá verulegan árangur af striti sínu í lifanda lífi þó að það voni vissulega að komandi kynslóðir muni njóta þess. Líkt og góðir listamenn vita skógræktarmenn að verk þeirra eiga eftir að lifa lengur en þeir. Í skógrækt þarf maður því að hugsa áratugi fram í tímann. Jafnvel aldir. Mikið væri gott ef fleiri gætu tamið sér slíkan hugsunarhátt, ekki síst þeir sem kunna aðeins að hugsa í kjörtímabilum.

Allt er í heiminum hverfult

2010-10-27T00:33:00.000-07:00

Rafbækur seljast meira en prentaðar

Walkman úr sér genginn

Dauðastríð geisladisksins

(fyrirsagnir í tækni- og vísindafréttum á mbl.is)

Tilvitnun dagsins

2010-10-24T15:21:00.000-07:00

,,Pólitík er atvinnuvegur skíthæla."
(Þórbergur Þórðarson, Ofvitinn.)

Fimmtán plötur á fimmtán mínútum

2010-09-21T08:09:00.000-07:00

Á dögunum var í gangi samkvæmisleikur á Facebook sem gekk út á það að notendur áttu að nefna þær 15 plötur sem hefðu fylgt þeim um ævina og væru því í sérstöku uppáhaldi. Ekki var fólki gefinn langur umhugsunartími. Ein mínúta á plötu, 15 mínútur alls. Sem gamall tónlistarunnandi og annálaður smekkmaður gat ég ekki látið mitt eftir liggja. Eftir 15 mínútna umhugsun og örlitla bakþanka lítur listinn svona út.

The Clash - London Calling
The Clash – Sandinista
The Rolling Stones - Exile on Main Street
Velvet Underground - Velvet Underground and Nico
The Jimi Hendrix Experience – Are You Experienced
X-Ray Spex – Germ Free Adolescents
Bob Dylan - Highway 61 Revisited
Bob Dylan - Subterranean Homesick Blues
Bob Dylan – Live 1966
Sigur Rós - Ágætis byrjun
Dave Brubeck Quartet - Time Out
Pixies - Doolittle
The Jesus and Mary Chain – Darklands
Depeche Mode – Violator
The Funerals – Pathetic Me

Hefði ég gert slíkan lista fyrir fimm árum hefði hann sennilega ekki orðið mjög frábrugðinn þessum. Sumar plöturnar hafa verið í uppáhaldi frá því ég var unglingur, aðrar uppgötvaði ég síðar á lífsleiðinni. Allar eiga þær það sameiginlegt að mér finnst gott að hlusta á þær frá upphafi til enda en ekki aðeins einstaka lög. Sumar voru fyrstu kynni mín af listamönnum sem ég hef síðan haft mikið dálæti á eins og Jimi Hendrix og Velvet Underground. Báðar þær plötur eru fyrstu verk téðra listamanna. Það sama verður ekki sagt um Clash-plöturnar tvær á listanum. Þær marka tvo hátindi á ferli þeirrar sveitar þar sem hún hefur komist til nokkurs þroska og tilraunastarfsemi og sköpunargleði ræður ríkjum. Að nokkru leyti á það einnig við um Exile on Main Street með Rolling Stones og Hvíta albúm Bítlanna sem datt út af lista á lokamínútunni. Fleiri Bítla og Stones-plötur komu upp í hugann við valið og það sama má segja um Bob Dylan sem þó nær þremur inn. Allar tengjast þær tímabilinu um miðbik sjöunda áratugarins þegar hann tók sér rafmagnsgítar í hönd við blendnar viðtökur aðdáenda. Flest nöfnin á listanum eru kunnugleg en þó er þar að finna að minnsta kosti tvær sveitir sem ekki eru í alfaraleið tónlistarunnenda: X-Ray Spex og The Funerals. Sú síðarnefnda er einnig ein af aðeins tveimur íslenskum sveitum sem komast á lista að þessu sinni. Af íslenskum plötum sakna ég helst frumburðar Apparats Organ Quartet og Með allt á hreinu með Stuðmönnum sem er ein fyrsta platan sem ég eignaðist. Eina djassplatan er klassíkin Time Out með Dave Brubeck Quartet, tónlist sem hefur verið í eyrunum frá því ég man eftir mér. Einhver kynni að spyrja sig af hverju djassplöturnar eru ekki fleiri. Því er til að svara að mér finnst djasstónlist yfirleitt best ,,live" og hlusta ekki mikið á hana af hljómskífum. Einnig kynni einhver að spyrja sig af hverju þarna er ekki að finna plötur með flytjendum sem þó hafa verið í miklu uppáhaldi í gegnum tíðina svo sem The Doors, The Who, HAM, David Bowie, The Allman Brothers Band, Singapore Sling, Joy Division og Gong. Við því er ekkert einhlítt svar.

Af Miðjunni

2010-09-16T09:11:00.000-07:00

Það er fátt um fína drætti á Miðjunni þessa dagana og svo hefur reyndar verið um alllangt skeið. Fréttir á forsíðu hafa ekki verið uppfærðar frá því í júní, ,,Bókin á náttborðinu” var síðast uppfærð í mars og íþróttafréttirnar í apríl. Þá mætti halda að bíósýniningar og tónleikahald hafi fallið niður á Íslandi í sumar enda ekkert nýtt í þeim dálki síðan í júlí. Þeir einu sem virðast enn vera með nokkru lífsmarki á Miðjunni eru fáeinir bloggarar sem skjóta inn einum og einum pistli, aðallega um mat og bókmenntir. Óneitanlega furðar maður sig á því af hverju vefurinn lafir enn í loftinu. Væri ekki betra að veita honum sómasamlega útför í stað þess að láta hræið rotna fyrir allra augum?

Grænmeti í stað sælgætis?

2010-09-15T07:20:00.001-07:00

Á Fésbókinni eru verslunareigendur hvattir til að bjóða 50% afslátt af grænmeti og ávöxtum á laugardögum í stað nammis*. Aðstandendur uppátækisins vilja með því taka þátt í að spara í heilbrigðiskerfinu og uppskera betri heilsu eins og það er orðað. Það er gott og blessað að hvetja veslunareigendur til að bjóða grænmeti og ávexti á betra verði. Það mættu þeir reyndar gera alla daga vikunnar. Er samt ekki óþarfi að stilla þessu upp gegn sælgætinu sem víða er lækkað í verði á þessum degi? Það má ekki gleyma tilganginum með því að hafa nammidag á laugardögum. Hann er einmitt að koma í veg fyrir að íslensk börn séu sínartandi sælgæti alla daga vikunnar. Þess í stað fá þau að borða fylli sína af því einn dag í viku og bursta síðan tennurnar vel á eftir. Það stuðlar að bættri tannheilsu ungviðisins sem er ekki vanþörf á enda áttu Íslendingar lengi vel heimsmet í tannskemmdum barna**. Slíkum nammidögum fylgir þó óneitanlega nokkur kostnaður, ekki síst hjá barnmörgum fjölskyldum, enda er sælgæti verðlagt hátt hér á landi. Með því að lækka verð á sætindunum á laugardögum koma verslunareigendur því til móts við þá fjölmörgu foreldra sem vilja halda nammidaginn heilagan.

*Skástrikun mín
**Ef til vill eiga íslensk börn enn þetta heimsmet.

Snúrur og pappír

2010-08-27T05:51:00.000-07:00

Ég lifi víst á þráðlausum og pappírslausum tímum.

Engu að síður er ég umvafinn snúrum og við það að drukkna í pappír.

Vegna fjölda áskorana

2010-08-18T11:28:00.000-07:00

er eini Íslendingurinn sem ekki var á Facebook búinn að skrá sig (aftur).

Ekki bara hilluskraut

2010-08-17T02:50:00.001-07:00

Það er kominn tími til að ég læri að leika á þetta ukulele sem hefur setið á stofuhillunni frá því að það kom í hús seint á síðasta ári.

Leggur og skel

2010-08-13T05:43:00.000-07:00

Leikföng eins og þau sem ég lék mér með sem barn má nú sjá í Fríðu frænku og á Árbæjarsafni.

Aldurinn færist óneitanlega yfir.

Kvöld eitt í sófanum

2010-08-07T05:39:00.007-07:00

H: Langar þig til að horfa á sjónvarpið?

E: Nei. Mig langar bara til að horfa á þig.

Léttir

2010-08-01T14:27:00.000-07:00

Það er ekki kviknað í húsinu eins og ætla mætti af lyktinni.

Nágranninn er bara að grilla.

Mikla hvað?

2010-07-08T12:48:00.000-07:00

Í minni fjölskyldu hefur túnið aldrei gengið undir öðru nafni en Klambratún.
Besti flokkurinn er kannski ekki svo slæmur.

Ferðalok 2

2010-07-08T12:42:00.001-07:00

Köngulóin víðförla sem klöngraðist alla leið upp á þriðju hæð var kramin til bana um leið og hún stakk forvitnu höfðinu inn um svefnherbergisgluggann.

Ferðalok

2010-07-06T10:19:00.000-07:00

Gasblaðran sem yfirgaf eiganda sinn í miðbæ Reykjavíkur þann 17. júní síðastliðinn endaði för sína í Sandahlíð, skammt frá Vífilsstaðavatni.

Mynd sem ekki var tekin

2010-06-15T11:41:00.000-07:00

í einu af nýju hverfum bæjarins þar sem enn hafa ekki verið lagðar gangstéttar spássera tvær eldri konur hlið við hlið úti á miðri götu, hvor með sína göngugrindina og litríka krullupinna í gráu hári.

Aldur er afstæður

2010-06-11T14:09:00.000-07:00

,,Mexíkó skipti inn einhverjum eldgömlum leikmanni, 37 ára, sem gat ekki neitt."
(ónefndur 11 ára áhugamaður um fótbolta)

Óskað eftir ábendingum

2010-06-05T17:18:00.000-07:00

um undarlegt málfar í Auðlegð íslenskrar tungu.
Sjálfur hef ég ekki rekist á neitt sérstakt að undanförnu.

Af úrslitum borgarstjórnarkosninga í Reykjavík árið 2010

2010-05-30T02:38:00.000-07:00

Æ!

Snúðu mér við

2010-05-28T14:26:00.000-07:00

Áletrun á gangstéttarhellu neðarlega í Túngötu.

Rassskelling í Reykjavík

2010-05-28T14:23:00.000-07:00

Það stefnir í að kjósendur í Reykjavík ætli að rassskella fulltrúa gömlu flokkanna í kosningum á morgun.

Það skyldi þó ekki fara svo að kjósendur fái sjálfir hluta af skellinum? Jafnvel mesta skellinn.

Í glugganum á næsta húsi

2010-05-27T15:49:00.000-07:00

Í glugganum á næsta húsi situr köttur makindalega og starir á mig. Ég gjóa augunum öðru hverju á hann, kann þó ekki við að stara þar sem það þykja ekki góðir mannasiðir. Ég man ekki til þess að hafa séð hann þarna fyrr. Líklega hefur hann heldur aldrei áður barið mig augum. Þess vegna erum við ef til vill svo forvitnir hvor um annan.

Eurovision - neðstu sætin

2010-05-27T13:26:00.000-07:00

Það besta við Eurovision-útsendinguna að þessu sinni hlýtur að vera yfirlitið yfir lögin sem lent hafa í neðsta sæti í gegnum tíðina. Ég hefði gjarnan viljað sjá heilan þátt með þeim.

Fréttamyndir nú á dögum

2010-05-20T15:41:00.000-07:00

Sum af mest sjokkerandi myndskeiðum sem maður sér í fréttum um þessar mundir eru teknar af öryggis- og eftirlitsmyndavélum.

http://news.bbc.co.uk/2/hi/americas/8696085.stm

Vandinn við að kaupa notaðan bíl IV

2010-05-19T14:33:00.000-07:00

Það er enginn vandi lengur.
Ég er búinn að kaupa bílinn.

Núna vantar mig bara eitt stykki 15 tommu álfelgu á Dodge Stratus árgerð 2003.

Nýtt met í íslenskum smáborgarahætti

2010-05-18T23:41:00.000-07:00

Er það virkilega efni í burðarfrétt í innblaði með forsíðutilvísun að minnst hafi verið á Ísland í amerískum teiknimyndaþætti? Aðeins einu sinni hef ég séð ámátlegra dæmi um íslenskan smáborgarahátt. Það var þegar Morgunblaðið birti stóra grein með tveimur myndum þess efnis að nafn söngkonunnar Bjarkar hefði verið krotað á saltkassa og sjálfsala í einhverri borg úti í heimi.

Dreymir þig stjórnmálamenn?

2010-05-16T03:10:00.000-07:00

Þá getur verið fróðlegt að athuga merkingu draumanna. Niðurstöður fengnar af síðunni www.draumur.is.

Jóhanna
Afar gott tákn í draumi, gæfuríkir tímar blasa við.

Össur
Er talið boða erfiðleika eða búskaparbasl.

Steingrímur
Þú mátt eiga von á erfiðleikum um tíma.

Mig dreymdi einmitt Jóhönnu um daginn. Heppinn.

Vandinn við að kaupa notaðan bíl III

2010-05-14T11:57:00.001-07:00

Merkilegur þjóðflokkur þessir sölumenn notaðra bíla.

Þeir þekkja ævisögu allra fyrrverandi eigenda bílanna á planinu.
Svo koma þeir alltaf af fjöllum þegar maður bendir þeim á sitthvað sem ekki er í lagi í bílunum sjálfum.

,,Nú er það?" er þá gjarnan viðkvæðið.

Trending Now samkvæmt Yahoo

2010-05-14T00:28:00.000-07:00

1. E. coli
2. Iron Man 2
3. Dalai Lama
4. Celine Dion

Vandinn við að kaupa notaðan bíl II

2010-05-10T12:36:00.000-07:00

Nú skil ég af hverju fólk tók bara myntkörfulán og fékk sér einn nýjan, beint úr kassanum.

Nálastungumeðferð

2010-05-06T07:47:00.000-07:00

Það jafnast ekkert á við það að klæða sig í glænýja skyrtu í fyrsta skipti.

Skemmtileg tilviljun á Hringbrautinni

2010-05-04T05:16:00.000-07:00

„Police on my back" í geislaspilaranum.

Blá blikkljós í baksýnisspeglinum.

Vandinn við að kaupa notaðan bíl

2010-05-03T09:52:00.000-07:00

Spindilkúlur, öxulhosur, upphalaramótor, ballansstangarendar, afturstífur, spyrnufóðringar . . .

Ég vissi ekki einu sinni að alla þessa hluti væri að finna í bifreiðum. Hvað þá að þeir gætu gefið sig. Jafnvel allir í einu.

Mæli með að fólk fari með bílinn í ástandsskoðun áður en það tekur upp veskið.

Plága í útvarpinu

2010-04-30T02:24:00.000-07:00

Næst þegar þetta hel...is lag með Diktu kemur í útvarpinu ætla ég að rífa viðtækið úr sambandi og fleygja því út um gluggann, Keith Richards style. Thank you.

(Kannski læt ég bara nægja að ýta á off-takkann)

Sjálfhverfasta stétt landsins stendur undir nafni

2010-04-29T14:12:00.000-07:00

Mikið afskaplega held ég að kollegar mínir í Blaðamannafélaginu ofmeti áhuga almennings á innri málefnum klúbbsins. Ein aðalfréttin á Vísi í kvöld fjallar um gang mála á aðalfundi félagsins sem hófst um hálftíma áður en fréttin fór á vefinn. Við megum ef til vill þakka fyrir að þeim datt ekki í hug að ryðja annarri dagskrá til hliðar og senda út beint frá samkomunni í sjónvarpinu.

White Man in Hammersmith Palais

2010-04-27T09:40:00.000-07:00

,,Guð, færðu okkur Joe Strummer aftur. Þú getur fengið Lady Gaga í staðinn."

(þetta stóð einhvers staðar á internetinu).

Vonbrigði

2010-04-25T08:25:00.000-07:00

Hér gæti ég skrifað fáeinar línur um upplifun mína af útskriftarsýningu Listaháskólans árið 2010. Það er hins vegar svo mikið um leiðindi og neikvæðni í samfélaginu þessa dagana að það er ekki á það bætandi. Vonandi tekst betur til að ári.

Nafli alheimsins

2010-04-23T13:20:00.000-07:00

Eldgos í Eyjafjallajökli er ekki lengur aðalfréttin í útlöndum líkt og verið hefur undanfarna daga. Áhugi Íslendinga á erlendum fréttamiðlum minnkar væntanlega í kjölfarið og verður aftur svipaður og hann var fyrir gos.

Klisjan um kassann og hugann

2010-04-23T04:26:00.001-07:00

Það ber ekki vott um að fólk hugsi mikið út fyrir kassann þegar það tönnlast stöðugt á að maður verði að hugsa út fyrir kassann.

Holl áminning

2010-04-21T11:46:00.000-07:00

Eldgosið í Eyjafjallajökli er holl áminning fyrir Íslendinga og heimsbyggðina alla. Hún minnir okkur á þá hættu sem stafað getur af eldsumbrotum og það tjón sem þau geta valdið. Og þó telst þetta gos enn sem komið er minni háttar í samanburði við ýmis önnur.

Eldgosið minnir heimsbyggðina á hversu háð hún er orðin nútímatækni og hvernig náttúran getur sett hana úr skorðum með litlum sem engum fyrirvara. Ég efast um að margir af strandaglópum vikunnar hafi leitt hugann að því að eldgos á Íslandi kynni að raska áætlunum þeirra með þessum hætti. Truflanirnar sem hafa fylgt Eyjafjallagosinu eru þó lítilvægar miðað við þær hörmungar sem ofureldgos myndu hafa í för með sér. Það er ekki víst að nokkur mannvera lifði af til að skrá þá sögu.

Það verður þó enginn heimsendir að sinni. Hann bíður betri tíma.

(Núna held ég að ég skrifi ekki meira um eldgos í bili. Tek upp þráðinn aftur þegar Katla gýs 10. júní.)

Elíza og Eyjafjallajökull

2010-04-19T15:21:00.000-07:00

Kötlugosið 1918 séð frá Reykjavík

2010-04-16T13:51:00.000-07:00

Þessi mynd eftir Magnús Ólafsson sýnir betur en orð hversu öflugt Kötlugosið 1918 var. Þarna má sjá bólstrana bera við Vatnsgeyminn í Reykjavík. Ég hef áður minnst á hvernig afi minn, þá á barnsaldri, neyddist til að flýja ásamt fjölskyldu sinni undan gosinu. Löngu síðar fluttist hann til Reykjavíkur og byggði hús við hliðina á Vatnsgeyminum góða við Háteigsveg.

(Ljósmynd fengin að láni frá Ljósmyndasafni Reykjavíkur)

Árið 1918

2010-04-16T13:24:00.000-07:00

Árið 1918 þegar Katla gaus voru aðeins fimmtán ár liðin frá fyrsta flugi Wright-bræðra. Þotuhreyflar voru enn fjarlæg framtíðarsýn. Nú eru þeir ómissandi hluti af nútímasamgöngum. Þó að menn hafi vitað um hættuna sem þeim stafar af eldgosumundir jökli er eins og menn hafi látið hana sem vind um eyrun þjóta. Þangað til núna.

Sérfræðingar

2010-04-16T06:32:00.000-07:00

Eftir bankahrunið voru ólíklegustu menn allt í einu orðnir sérfræðingar í hagfræði og fjármálum. Litlu skipti hvar í stétt menn stóðu, allir höfðu skýringar á reiðum höndum og máli sínu til stuðnings brugðu þeir leikandi fyrir sig hugtökum úr kennslubókum í hagfræði og viðskiptafræði.

Núna er allt í einu annar hver maður orðinn jarðfræðingur.

Örlagavaldurinn Katla

2010-04-15T14:54:00.000-07:00

Þegar Katla gaus síðast, árið 1918, var langafi minn bóndi í Álftaveri í Vestur-Skaftafellssýslu. Svo illa léku hamfarirnar bújörðina að hann neyddist til að yfirgefa hana og flytja ásamt konu sinni og barnaskaranum til Vestmannaeyja. Þar var ekki um auðugan garð að gresja fyrir bóndann þannig að hann skipti um karríer og gerðist yfirfiskimatsmaður. Afi var aðeins á sjöunda ári þegar hann upplifði hörmungarnar í Álftaveri og fluttist til Eyja þar sem hann átti síðar eftir að kynnast verðandi eiginkonu sinni. Ef Katla hefði ekki gosið þetta örlagaríka ár er ekki víst að ég væri að skrifa þessi orð núna.

ay-yah-FYAH'-plah-yer-kuh-duhl

2010-04-15T05:34:00.000-07:00

Framburður orðsins Eyjafjallajökull samkvæmt Washington Post.

Þegar keðjusagirnar þagna

2010-04-14T13:08:00.000-07:00

má aftur greina söng fuglanna í skóginum.

Kötlugos hefst 10. júní

2010-04-14T11:18:00.000-07:00

Veðja flösku af rauðvíni á það.

Skýrslan árituð af útrásarvíkingum

2010-04-13T14:06:00.000-07:00

Ég væri alveg til í að borga svolítinn pening fyrir þannig eintak.

Sandinista! - Taka tvö

2010-04-13T14:00:00.001-07:00

Mikið afskaplega hlýtur að hafa verið gaman að taka upp svona plötu og ótrúleg tónlistarleg þróun hjá hljómsveit sem örfáum árum fyrr spilaði nær eingöngu hrátt og einfalt pönk. Þetta er samt engin London Calling.

Skýrlsa og flesna

2010-04-12T15:12:00.000-07:00

Ég skrifaði alltaf fuglaflesna á sínum tíma.

Seint berast tíðindin

2010-04-12T12:16:00.000-07:00

Í dag berast loks fréttirnar sem maður hefði átt að heyra haustið 2008, ef ekki fyrr.

Sandinista!

2010-04-10T17:05:00.000-07:00

Ég hef verið einlægur aðdáandi The Clash frá því ég var 14 eða 15 ára. Aðdáunin hefur vaxið með árunum sem verður ekki sagt um allar hljómsveitir sem ég kynntist á þessum tíma. Það var samt ekki fyrr en í dag (eða öllu heldur í gær) að ég festi kaup á þessari umdeildu plötu enda hef ég verið hálfhræddur við hana. Þegar hún kom út á sínum tíma var hún þreföld vínylplata sem sumir segja að hefði nægt að vera tvöföld. Aðrir ganga enn lengra og segja að hún hefði verið góð einföld plata. Ég er á báðum áttum eftir fyrstu hlustun. Hún virðist vera langt frá því jafnsterk og London Calling (sem er vel að merkja ein af mínum uppáhaldsplötum ásamt Exile on Main Street með Stones og fleiri góðum). Ég ætla þó að bíða með að fella lokadóm fyrr en ég hef hlustað á hana að minnsta kosti tíu sinnum.

Síðasta sveitin sem skipti máli

2010-04-10T14:33:00.000-07:00

Á sínum tíma var The Clash stundum kölluð ,,eina hljómsveitin sem skipti máli". Þegar maður lítur yfir þróun rokksins undanfarin ár og áratugi hallast maður að því að hún hafi verið ,,síðasta hljómsveitin sem skipti máli". Í útvarpinu er hver rokksveitin annarri leiðinlegri, eintómir vælukjóar og hermikrákur sem hafa ekki upp á neitt nýtt eða spennandi að bjóða. Mætti ég þá frekar biðja um Buddy Holly eða The Rolling Stones. Eða The Clash.

Malcolm McLaren In Memoriam

2010-04-09T14:57:00.000-07:00

Pönkið hefði plummað sig vel án hans. En hann var án efa góður bisnesskarl.

Aldrei að treysta broskarli

2010-04-08T11:54:00.000-07:00

:-)

Auðlegð íslenskrar tungu uppfærð

2010-04-07T15:18:00.000-07:00

Ég hreinlega varð að uppfæra tilvitnanasafnið góða í fyrsta skipti í nærri tvö ár. Aðalhvatinn var þingsályktunartillaga um stofnun prófessorsembættis kennt við Jónas Hallgrímsson. Lesendur (ef einhverjir eru) geta enn sem fyrr sett inn ábendingar um undarlegt málfar í kommentakerfið.

Hannes Hólmsteinn

2010-04-06T14:00:00.000-07:00

Með þetta nafn ætti maðurinn að vera annað hvort listmálari eða ljóðskáld.

Orð og myndir

2010-04-05T13:35:00.001-07:00

Stríðsherrar reyna alltaf að takmarka aðgengi fólks með myndavélar að vígvöllum heimsins. Þeir vita að myndefni þaðan getur haft mikil áhrif á afstöðu almennings til stríðsrekstursins. Það á jafnt við um hreyfimyndir sem ljósmyndir. Það sem hreyfir mest við manni núna eru þó ekki myndirnar sem slíkar heldur ummæli þeirra sem halda um gikkinn.

Negldur á kross

2010-04-02T11:04:00.000-07:00

Ætti maður að láta krossfesta sig á föstudaginn langa að ári? Það myndi óneitanlega lífga svolítið upp á þennan leiðinlegasta dag ársins. Svo kæmist maður kannski í sjónvarpið.

Harmspá

2010-03-31T14:38:00.000-07:00

Ég er ekki svartsýnn að eðlisfari en nú er ég ansi hræddur um að einhver eigi eftir að fara sér að voða við eldstöðvarnar.

Rok og kuldi

2010-03-28T13:58:00.000-07:00

Það er ekki séns að ég fari að klöngrast upp á Fimmvörðuháls.

Í þessu veðri hrýs mér hugur við að þurfa að fara út með ruslið.

Best er að sitja inni og orna sér við eldgosamyndir á sjónvarpsskjánum.

Funny how quick the milk turns sour

2010-03-26T09:22:00.000-07:00

Það er eitthvað við Beautiful South (og Housemartins), lagasmíðarnar, textana og myndböndin. Þetta er með þeim betri.

Fékk keðjusög í fótinn

2010-03-23T12:36:00.000-07:00

Ég rak einu sinni keðjusög á fullum snúningi í fótinn á mér. Sem betur fer var ég í hlífðarbuxum þannig að keðjan stöðvaðist áður en hún nam við skinn en buxnaskálmin lá eftir í tætlum. Óneitanlega er maður gætnari eftir en áður. Samt veit maður aldrei hvað kann að gerast. Ef ég rek sögina aftur í mig - og að þessu sinni inn að beini þannig að mér blæði út í skóginum - vona ég að sagan endi ekki sem furðufrétt í einhverjum fjölmiðli úti í heimi.

Einnig lá eitt sinn nærri að ég fengi stærðarinnar sitkagreni í höfuðið á mér en það er önnur saga.

Enn af auglýsingu Símans

2010-03-21T14:34:00.000-07:00

Ætli margir séu að uppfæra Fésbókarstatusinn eða svara tölvupósti á Fimmvörðuhálsi þessa stundina?

Safna mottu?

2010-03-20T02:02:00.001-07:00

Ég viðurkenni að mig hefur lengi langað til að prófa að safna skeggi á efrivör. Aftur á móti hef ég ekki áhuga á að taka þátt í einhverju hópefli, jafnvel þó að málefnið sé gott.

Ég verð því víst að bíða um sinn. Kannski verður mottumaí hjá mér í stað mottumars. Þá verður æðið gengið yfir og hinir búnir að raka af sér skeggið.

Annars kann ég betur við orðið yfirvararskegg. Í þessu samhengi er motta nefnilega stytting á orðinu hormotta sem getur seint talist aðlaðandi, hvað þá kynæsandi.

Auglýsingar missa marks

2010-03-19T08:38:00.000-07:00

3G auglýsingar símans sannfæra mig ekki.

Þvert á móti. Á Fimmvörðuhálsi og í Skaftafelli myndi ég gjarnan vilja vera án Fésbókarinnar og tölvupóstsins.

Sjóndepra

2010-03-19T08:37:00.000-07:00

Skyndileg sjóndepra var á misskilningi byggð.

Við nánari athugun reyndist rúðan skítug.

IceSave My Ass

2010-03-14T12:32:00.000-07:00

Hvar ætli maður geti orðið sér úti um svona kaffibolla?

2010-03-13T13:24:00.000-08:00

Jæja!

Það er aldrei að vita nema maður byrji að skrifa hér á ný!

Auðlegð íslenskrar tungu - uppfært 24. janúar 2011

2007-05-11T15:16:00.000-07:00

- Fýsileikakönnun á köfunarstarfsemi í afþreyingarskyni

(heiti á meistararitgerð)- NÝTT

- Fjármuni í felum á aflandseyjum á ég enga.

(Jón Ásgeir Jóhannesson, yfirlýsing)

- Íslensk tunga er ankeri íslenskrar þjóðar, lykillinn að sjálfstæðri menningu og þjóðerni. Íslensk tunga hefur alltaf átt undir högg að sækja, en hún er lífseig með eindæmum og ber þannig spegilmyndina af eðli þjóðarinnar og virðingu fyrir tungunni þótt stundum pusi í þræsingum. Um þessar mundir á íslensk tunga undir högg að sækja og rótgrónar stofnanir á Íslandi hafa meira að segja látið sér detta í hug að setja erlenda tungu í fremstu víglínu tungutaks Íslendinga við hlið íslenskunnar. Við slíku verður að sporna af lífs og sálar kröftum því sjálfstæði Íslands kann að vera í húfi.

- Jónas Hallgrímsson kom sem vorvindur inn í íslenskt tungutak fyrir 200 árum og enn er vorvindurinn í loftinu, slíkt var afl skáldsins til þess að ríma við möguleika íslenskunnar á náttúrulegum grunni hennar.

- Enn þá andar suðrið sæla af tungutaki Jónasar og það er mikilvægt að virkja þessa auðlind inn í hjartslátt þjóðarinnar í starfi og leik.

(Tillaga til þingsályktunar um prófessorsembætti kennt við Jónas Hallgrímsson)

- Hámörkun afrakstrar virðiskeðju sjávarafurða. (heiti á fyrirlestri)

- Samtök áhugamanna um fagleg vinnubrögð (SÁUFV) er hópur manna sem leggur áherslu á stuttar boðleiðir í gagnvirkum samskiptum á vinnustöðum. Einnig berjumst við að auka almenna rýmisgreind þegar kemur að afmörkun ytri og innri mörk tiltekinna skipulagsheilda.
(Úr stefnuyfirlýsingu Samtaka áhugamanna um fagleg vinnubrögð)

- Fáein dæmi úr ensku - sjá Soft language: http://www.youtube.com/watch?v=h67k9eEw9AY -

- Rekstur á nýju búsetuúrræði með félagslegum stuðningi. (úr fréttatilkynningu)

- Framhaldsaðalfundur Félags fagfólks í frítímaþjónustu fór fram í
Frístundamiðstöðinni Frostaskjóli þann 9.júní sl. (úr fréttatilkynningu)

- Elín Hansdóttir (f. 1980) er íslenskur innsetningalistamaður, sem kemur fyrir gagnvirkum miðlunar- og rýmissamstæðum sínum rétt eins og byggingum í byggingum. Þannig umbreytist raunverulegt umhverfi í sálrænan og fyrirbærafræðilegan leikvöll. (úr sýningarskrá)

- Vettvangur frítímans (auglýsing frá ÍTR)

- Ólínuleg myndskráning og notkun tölfræðilíkana við greiningu á segulómmyndum og tölvusneiðmyndum.
(Heiti á fyrirlestri í HÍ)

- Biðjandinn á Þröskuldinum vísar í meðvitaðar og ómeðvitaður hugsanir sem vaxa út með tilfinningakrafti í formi innvortis og útvortis leitar að sjálfsþekkingu og þar af leiðandi þekkingu á mannskepnunni og hennar marglaga birtingamyndum. Stemmur úr fortíð og framtíð blandast saman og mynda sína eigin goðsögu sem endurspeglar bæði þekktar og óþekktar goðsagnir úr sögu mannsins. Sýningin er einskonar stutt biðstaða á þröskuldinum á ferðalagi sem ekki sér fyrir endann á.
(Úr fréttatilkynningu fyrir myndlistarsýningu í Kling & Bang galleríi)

- Heiltölubestun er línuleg eða ólínuleg bestun sem inniheldur það skilyrði að ein eða fleiri breytur geta aðeins tekið gildi heiltölu. Þetta getur til dæmis átt við þegar verið er að ákveða hvort eigi að framleiða eitthvað á tiltekinni vél eða ekki og ef um er að ræða að til fellur fastur kostnaður ef eitthvað er framleitt.
(Úr námsefni í viðskiptafræði við HÍ.)

- Í þessum fyrirlestri eru rök færð fyrir því að samtengingin og sé í raun og veru ekki venjuleg samtenging og tengi því ekki tvo atburði heldur tvo þætti eins atburðar. Að auki er því haldið fram að ástæðan fyrir því að þessar samsetningar með stellingarsögn fái framvindumerkingu stafi af ósamræmi í stöðu ytri rökliðar, í samræmi við kenningar Kratzers (1994).
(ég man ekki hvar ég rakst á þetta, líklega fyrirlestur í HÍ)

- Fremstir í ferskum fiski til fagaðila
(stóð á flutningabíl frá Sjófiski)

- Sú stefna hefur verið mörkuð að rafræn sjúkraskrá LSH verði einingabyggð, það er að segja að hún verði starfræn heild staðlaðra hugbúnaðareininga sem tengdar eru með samþættingarlagi. (Af vef Landspítalans)

- Eftir talsvert ýtarlega, gagnrýna athugun á fyrirliggjandi athugunum komst Elvik (1993) að þeirri niðurstöðu að virði tölfræðilegs lífs til nota við mat á þjóðhagslegri hagkvæmni aukins umferðaröryggis væri 104 millj. kr. á verðlagi ársins 1995.

- Einstakt ferli, sem samanstendur af samræmdum og stýrðum verkþáttum með skilgreint upphaf og endi, sett af stað til að ná markmiðum er samræmast sértækum þörfum, þar á meðal takmörkunum er varða tíma, kostnað og aðföng.
(Spurningin var: Hvað er verkefni?)

- Aðferð til að stýra og samhæfa mannleg og efnisleg aðföng á æviskeiði verkefnisins með því að nota nútímatækni til að ná tilsettum markmiðum um umfang, kostnað, tíma, gæði og þarfir þátttakenda.
(Skilgreining á verkefnastjórnun)

- Kennimark viðfangs er notað til að auðkenna ýmsa hluti í upplýsinga-og fjarskiptatækni og er skilgreint sem hnútpunktur í nafnarými sem byggt er eins og tré. Kennimark er byggt á ASN.1 ( Abstract Syntax Notation One) sem er skilgreint í staðlinum X-680 frá alþjóðafjaskiptasambandinu ITU -T. ASN1.
Kennimörk koma víða við sögu þar á meðal í rafrænum skilríkjum, s.s. fyrir vísun í vottunarstefnu, yfirýsingskjöl og sem aðgreind heiti viðfanga.

- Samstarfsvettvangur fjarskiptaeftirlitsstofnana í Evrópu.

- Við mat á því hvort samningur um uppgjör í undirliggjandi þáttum teljist til afleiðu í skilningi ákvæðisins ber að líta til þess hvort hann hafi fjármálatilgang.

- Helstu verkefni eru hönnun og smíði gagnavöruhúsa sem og greining gagna og lausnasmíði.

- Undir hámörkun á nýtingu mannauðs falla lausnir á neðangreindum sviðum.

- Alhliða lausnir á sviði ráðninga.

- Það sem liggur til grundvallar húsnæðisvanda stofnunarinnar er óviðunandi húsnæðisaðstaða.

- Á grundvelli framangreindra ítrekaðra ætlaðra ólögmætra athafna mótmælendanna, og með vísan til 15. gr. lögreglulaga hafi lögreglustjóri ákveðið að nýta sér heimildir í nefndri lagagrein og fyrirskipað brottflutning fólksins af svæðinu.

- APOBEC3 (A3) prótein eru fjölskylda cytósín deaminasa í spendýrum sem geta hindrað retróveirur með því að afaminera cýtósín í úrasíl í einþátta DNAi meðan á víxlritun stendur.

- Vandi í flæði sjúklinga krufinn.

- Unnið að aukinni dreifistýringu innan spítalanna.

- Bylting í svefnlausnum.

- Rafstaðlaráð er fagstaðlaráð Staðlaráðs Íslands á rafmagnssviði.
- Regnhlífasamtök fagfélaga heildrænna meðferðaraðila.
- Heilsuhagfræðileg áhrif nýrnaígræðslu.
- Hátíðnilúsakambur og hátæknisalerni.